مراجعه سيارة Fiat 500e

No comments

هذا المقال ليس مراجعة شاملة للفيات ولا يهدف ليكون مقارنة بينها وبين النيسان ليف, هي مجموعة من الملاحظات من استخدام بضع أيام فقط.

1. السيارة كيوت! جميلة يا زلمة ليش الحكي, من جوا ومن برا, واضح مهتمين كثير بموضوع الجماليات فيها والتركيز على التفاصيل.
2. قوية جدا, بتصدمك صراحة, اقوى من الليف والفوكس.
3. الثبات فيها اقل من الليف, مع انها ثقيلة السيارة بس بتحس لما تدعس انك بتفقد السيطرة, عمري ما حسيت هيك بالليف, ربما عزمها مش متناسب مع طول الشصي وباقي الأنظمة.
4. نظام التعليق (Suspension) مش ولا بد, بتحس بكل مطب او حفرة بظهرك, مع انه نظام التعليق في الليف مش ممتاز برضه, بس بضله احسن.
5. بالنسبة للمسافة المقطوعة بالشحنة, جربت اروح فيها على المطار, استهلكت رايح جاي 72% من الشحنة, بينما لنفس المشوار بتستهلك الليف اللي معي 54% فقط, بس الحق يقال رحت على الفجر وكانت درجة الحرارة حوالي 10 مئوية, يمكن هذا نزل المسافة شوي.
6. بسيطة جدا جدا, شغل وحط D وامشي وبس, ما فيها مثلا eco ولا B.
7. ما فيها جير!! يا الهي شو تغلبت, يمكن عشان مش متعود, بس مزعج لما بدك ترجع وتقدم عشان تطلع من مكان, بس عشانها صغيرة بتطلع بسرعة.
8. السيارة عنجد صغيرة, من الطول والعرض, يعني مثلا اذا كنت سايق وابنك بدأ فقرة السقاعة في الكرسي الخلفي بتقدر تتناوله بدون ما تحرك جسمك بالمرة, شايفين, مين حكى انه السيارة مش عائلية؟
9. النظام الصوتي فيها خرافي! انا ما بسمع أغاني بس على الراديو وخلال المكالمات الصوت كان واضح جدا, افضل من نظام ال S في الليف بمراحل, ربما قريب من premium.
10. في كبسات خلف المقود! ما اذكاهم, مريح استخدامهم جدا.
11. ما عندهم تدفأة للمقود, بس الكراسي.
12. فيها فتحة وبانوراما, يا بختهم.
13. المرايا الجانبية فيها ممتازة, تصميمها ذكي جدا وما في نقطة عمياء, مش زي مري الليف المتخلفة.
14. نظام تثبيت السرعة (Cruise Control) كثير افضل من اللي في الليف, بحافظ على السرعة على النزول بشكل ممتاز.
15. فيها شاشة بتفرجيك كم المحرك بسحب او بشحن بالكيلوواط بالارقام, رائعة, افضل من الدوائر في الليف.
16. بتفرجيك معلومات شاملة عن كل رحلة بتعملها, زي مثلا معدل الاستهلاك والمسافة المقطوعة ومعدل السرعة, في الليف مثلا لازم تصفر هاي الأشياء بنفسك.
17. للأسف للأسف ما فيها (Keyless Entry and Start) يعني ما في نظام البصمة و مفتاحها زي أي سيارة عادية, ولازم تحطه بالسوتش وتشغل, قمة الغباء صراحة.
18. الزامور فيها قصة! تخيل بنت عمرها 10 سنين وهيك بريئة ومسكينة, تيجي عليها وتسألها كيفك عمو, تروح تجاوبك بصوت شاب خنشور “ايش مالك أبو الشباب”, هيك بالزبط كان شعوري لما زمرت فيها اول مرة, انصدمت, من وين بطلع الصوت!

في المحصلة السيارة جميلة جدا وقوية وسواقتها ممتعة جدا, بنصح الناس فيها اذا بتناسب احتياجاتهم.
اللي بسوق الفيات شخص كول, واللي بسوق الليف اولد سكول.

adminمراجعه سيارة Fiat 500e

Leave a Reply

Your email address will not be published. Required fields are marked *